jollibee rizal

tinakpan ng panyo ang ilong laban sa nakakasulasok na usok

ang malatambutsong bibig ng drayber ang salarin

NO SMOKING ang sabi sa karatulang sa loob mismo ng cab idinikit

maingay at kahit nakaearphones ay rinig ang kwentuhan, sigawan at sirena ng mga sasakyang nalilito sa direksyon ng punta-balik na rota sa bayan

sa likuran ay my kumakalabit, isang matandang babaeng hindi ko kayang panindigan ang kasiguraduhan sa pagiging mahina at dugyot

totoong umuunlad na ang Puerto

ang init ng araw ay tagos sa loob ng manipis na latang bubong

may nagpapaypay ng papel, plastik, dyaryo, folder, totoong pamaypay at panyo

nakaka-OP ang hindi pagpawisan

umaalingasaw ang mga naghalo-halong amoy ng pawis sa kilikili at hininga

ang lahat ay inip na naghihintay sa garalgal na senyales ng dispatcher

sa kabilang bintana ay tanaw ang Chowking- pula, puti at dilaw

parang tanghali sa dami ng kumakain eh alas dose palang

pilit kong tinanggap na kwarenta minutos ang presyo ng tanghalian

sumakit ang mata sa katititig sa mga trafic lights na tila bago sa paningin

may naki-abot ng bayad, "sa adventist lang po".."tiniguiban"

may pumasok at agad ay lumabas din ng makitang sa dulong unahan nalang ang bakante

sumimangot ang lalaking sumisigaw ng "o PSU!!!san pedro!!!"

sabik nang kunin ang siguradong limang pisong komisyon

mayamaya ay pumasok ang isang matandang tuyong-tuyo ang kulay at outfit maliban sa amoy lana, pumosisyon sa tabi ko

NCCC na large plastic at karton ang mag-isang hirap na binit-bit at ipinasok sa sasakyan

umangat ang kilay ng maganda at artipisyal na babae sa harap ng my edad

lalong sumikip ang paligid sa kanyang mahalay na kasuotan

huminga ako ng malalim at sinubukang mag-isip ng my mga bagay na normal sa aking edad

natalo ng kabutihan ang kasamaan at nagpatuloy ako sa pagpursigi ng mabuting asal

mga senaryong araw- araw man umiba o maulit ay okay lang

pinikit ang mga mata at nakontento na lamang makinig

maya-maya, umandar na ang makina at sa wakas ay sinaklolohan ang umaapaw na pagka bagot

umikot ang gulong kasabay ng aking kamalayan

dumukot ng walong piso sa bulsa at iniabot sa amoy asupre at madungis na kamay ni NONOY.